造物主創造人類嗰陣，點解要畀個嘴巴大家？除咗用於食嘢維持生命，可能都想大家多啲用把口分享，表達心入面嗰句，以減少互相猜測所產生嘅誤會。香港女子100米短跑運動員 梁筠宜好鍾意同人傾偈，所以今集《Sportsomate》就邀請咗佢上嚟同主持椰青吹水無邊。由外表講到性格；由開跑嘅優噏講到受傷嘅陰霾。2024年係筠宜過得比較辛苦嘅一年，原本對自己寄予厚望，但因為受傷而陷於低潮，平時樂於分享嘅佢，都變得有口難言。可幸嘅係，今日佢終於可以喺節目入面嘻嘻哈哈咁講故事！最近復出重返賽場，筠宜其實都有啲壓力，不如一人一句轟炸吓佢？ 主持：椰青 嘉賓：女子100米短跑運動員 梁筠宜 Sportunes 網站 | www.sportsoho.com/sportunes Instagram | www.insta…

會計師嘅「日」係返工，會計師嘅「夜」都係做嘢，咁更夜呢？譚嘉敏（Carman）就揀咗用嚟跑步。有時夜晚11點先離開公司，Carman 都會用最快速度返屋企換衫再落街跑步，瞓落床可能已經凌晨1點。工作、休息同跑步，Carman 話佢用咗十年時間去鑽研其中嘅平衡，但仍然摸索中。近年嘅跑步成績非常亮眼，全馬亦已經Sub 3過好幾次，但呢啲竟然唔係 Carman 最初嘅願望？原來一直以嚟，Carman 最想係喺10K賽事突破40分鐘，全馬Sub 3只係誤打誤撞而出現嘅成果，最近佢終於以39’06完成石門10K比賽，Carman形容係「圓夢」！ 咁呢個夢完咗，下一步做咩好呢？呢位愈跑愈有嘅跑手，又有啲咩心得同大家分享？ 主持：牛英 嘉賓：本地跑手 譚嘉敏 Carman Sportunes 網站 | w…

南極嘅風係點㗎？行入南極冰川，原來嗰種凍係會由腳趾一直凍到入心？有關極地嘅數據同圖片，上網打兩隻字就搵到，但憑住一張圖、一條片，我哋可以感受到嘅有幾多呢？攀石愛好者 Katie Liu 喺幾年前先知道原來世界上有極地嚮導呢份工作，為咗可以親身體驗南極，Katie 自學咗好多冰雪知識，但佢冇諗過機會比佢想像中更早嚟到。踏上南極船甲板嘅一刻，曾經幻想過嘅畫面終於出現眼前，Katie 有咩感覺？每一場同冰雪、野生動物、客人甚至同事嘅邂逅都係唯一，Katie 發現人生真係可以有唔同嘅形狀。今集《Sportsomate》，或者我哋都可以一齊學吓「在有限的時空裡，過無限廣大的日子」。 主持：椰青 嘉賓：極地嚮導 Katie Kiu Sportunes 網站 | www.sportsoho.com/spo…

「你必須很努力，才能看起來毫不費力。」呢句說話套用喺非全職跑手張耀樑身上，可以話非常貼切。以2小時24分11秒完成渣打香港馬拉松2025全馬賽事，阿樑再次喺同項賽事中躋身本地三甲。旁人睇，阿樑輕輕鬆鬆就Sub 3，但其實「有天賦」嘅佢，有別於全職跑手，曾經需要日打兩份工，通宵工作仲要照顧小朋友，連休息嘅時間都欠奉，佢都要攞啲時間出嚟練跑。由自己一個憑感覺跑搞到大傷，到有緣搵到教練進行有系統訓練，阿樑嘅跑步表現同成績都一直進步中。問到有啲咩心得可以分享，阿樑就笑住話：「值得學習嘅嘢我分享唔到，但有啲唔好嘅嘢可以提醒大家唔好學。」想知阿樑有啲咩忠告畀大家，佢又係邊一刻覺得有需要搵教練？留意今集《又係我牛英》！ 主持：牛英 嘉賓：渣打香港馬拉松2025 本地季軍 張耀樑 Sportunes 網站 …

體育同學業能否並行，係唔少學生運動員面對緊嘅問題，作為體育組老師嘅鍾慧樺（Ice）亦感同身受。Ice 自己係沙排同排球運動員，一直都相信「體教合一」，學生嘅表現亦令佢深信兩者並行並非遙不可及。有學生為咗團隊而放棄自己個人榮譽、有學生面對傷患依然沉住氣無間斷比賽，喺一間傳統男校任教，每日望住醉心學界比賽嘅男生，呢位女老師同佢嘅學生係點樣互相影響？喺女校出身嘅 Ice，入行前原來畀前輩「警告」過千祈唔好教男校？除咗教學同個人運動訓練，Ice 最近仲踏足幕前，係咩原因令佢踩埋入電視綜藝？ 主持：椰青 嘉賓：體育組老師 鍾慧樺 Ice Sportunes 網站 | www.sportsoho.com/sportunes Instagram | www.instagram.com/sportunes_…

「成功自古在嘗試」，呢句說話可以話係前香港殘奧代表高誌樫嘅庭右銘。高 Sir 喺12歲嘅時候因為踢波後嘅意外而失去右手，但呢55年嚟，佢嘗試過嘅運動項目已經超過佢成為獨臂俠嘅年期。由獨木舟、運動攀登，再到溜冰、滑雪⋯⋯高 Sir 從來都冇因為身體上嘅缺陷而停止學習，縱然有啲運動會因為自身限制而冇辦法繼續，佢仍然主張先嘗試。因為呢種「唔甘心」嘅鬥志，高 Sir 除咗成為單手划獨木舟五公里世界紀錄保持者，亦為自己贏得一次又一次「為自己驕傲」嘅機會。運動攀登只有一隻手，到底要點樣先可以爬上6米高？獨臂又點樣平衡自己，由香港划艇到澳門？ 主持：牛英 嘉賓：單手划獨木舟五公里世界紀錄保持者 高誌樫 Sportunes 網站 | www.sportsoho.com/sportunes Instagram…

「恐懼是預期潛在傷害的心態。」明明冇事發生，但你就係驚。游水教練 Kiana Chan，自稱恐水治療師，因為佢明白，要學識游水首先要克服恐懼。知道自己驚啲乜，先能夠喺水入面感到自在，繼而得到游水嘅技能。成日聽到人話「驚水」，Kiana 就話，學員驚緊嘅可能係其他嘢。所以上堂前，Kiana 會同學生傾偈，了解佢哋「驚水」嘅原因甚或背景故事，有時講完幾句，佢哋已經可以喺短時間內掌握晒四式。如果咁講，識游水，係咪就等於唔驚水？問吓自己：泳池游水冇問題，落海玩水又得唔得？咁⋯⋯ 你知自己驚啲咩未？ 主持：椰青 嘉賓：恐水治療師 Kiana Chan Sportunes 網站 | www.sportsoho.com/sportunes Instagram | www.instagram.com/spo…

兩年前接受過牛英訪問嘅麥兆天，當年仲係個一腔熱血「衝」字行頭嘅少年搏擊運動員，經歷兩年洗禮，參加過好幾次海外比賽，同過同門師兄弟打到上拳擊賽冠軍戰，仲喺「培生擂台」對戰過大自己成二十年嘅日本拳手，今時今日嘅麥兆天似乎成熟唔少。除咗技藝更進一步，喺對待自己同對待比賽方面，佢嘅心態都唔同咗好多。呢兩年，阿天喺比賽中有啲咩得著？除咗睇到自己嘅優缺點，阿天亦發現咗一個有關於香港搏擊運動嘅問題，雖然憑一己之力未必解決到，但佢就從中建立咗更多嘅發展方向，想知係咩，即刻收聽今集《又係我牛英》啦！ 主持：牛英 嘉賓：終極激鬥——香港站2024 男子組67公斤級別冠軍 麥兆天 Sportunes 網站 | www.sportsoho.com/sportunes Instagram | www.instagra…

運動員受傷並唔罕見，有人傷癒復出狀態大勇，亦有人無奈放棄轉換跑道，前甲組欖球運動員 Alexa Chan，係第三種。Alexa 經歷過大傷之後幾個月，已經如常訓練，身體上能夠適應，可惜心理上始終跨不過。由天水圍草根球隊打到上甲組，Alexa 喺欖球運動打滾咗七年，離開之時先發現自己對欖球嘅愛並唔係想像中咁。「我好鍾意呢個運動！」究竟係鍾意個運動本身；定係鍾意投入呢個運動嘅自己呢？後來嘅 Alexa 成為咗一位手刺紋身師，以密集嘅點點拼湊成一幅又一幅人體畫作，或者同佢參與至離開運動後嘅人生一樣，唔同嘅時間點夾埋一齊，就係一幅畫。 主持：椰青 嘉賓：前甲組欖球運動員 Alexa Chan Sportunes 網站 | www.sportsoho.com/sportunes Instagram |…

年輕跑手蔡沛恩（Coco），曾經喺學界田徑同越野跑界叱吒一時，後來因為受傷，由天堂跌咗落地獄。多得一班跑友軟硬兼施，Coco近幾年終於重出江湖，2023年初馬以3小時14分超班完成賽事。Coco笑言，啱啱練返跑，連跑友嘅車尾燈都見唔到！不過由熱身開始跟起，加上正向嘅訓練心態，佢有信心自己好快會跑返上以前嘅水平，甚至超越過往嘅自己。跑完名古屋，再喺柏林馬拉松以3小時02分PB埋嘅Coco，今年將會再次挑戰渣打馬拉松，Sub3指日可待，呢段期間佢嘅練習係點？從受傷陰影行返出嚟，Coco話有幾樣嘢一定要記得，首先竟然係唔好怕再受傷？ 主持：牛英 嘉賓：資深跑手 蔡沛恩 Coco Sportunes 網站 | www.sportsoho.com/sportunes Instagram | www.i…

Yoooooo 又係佢龍威！今集《Sportsomate》有近年非常受歡迎、憑美色同身材吸引一眾健身界朋友追隨嘅Caleb a.k.a @din.la.jor 向師姐！Gym Room 要笑聲笑聲滿載溫馨，除咗上堂嘅人要開心，教練們更加要開心，睇 Din.La.Jor 喺社交平台上載嘅短片已經略知一二。內容博到大家一笑，係因為呢啲喺健身室發生嘅事，去 Gym Room 嘅朋友都遇過，仲有機會自己就係呢啲故事嘅主角，共鳴感 Up Up！靈感來自日常，Caleb 眼中嘅健身室眾生相係點㗎呢？佢自己又最鍾意見到咩類型嘅客人？2025年第一日，一於笑住操，笑住舉，身體健康開開心心啊各位！ 主持：椰青 嘉賓：Gym Room 龍威 Caleb @Din.La.Jor Sportunes 網站 | ww…

一世人流流長，總會遇過幾段刻骨銘心嘅情緣。而喺大部分單車仔嘅一生，亦會遇過最少三架令人難以忘懷嘅愛車。今集《又係我牛英》，嘉賓係2024香港U23公路計時賽冠軍李展朗（Leo），佢同主持牛英一樣，都係喺公路上馳騁過多年嘅單車仔，兩個人志趣相投，自然愈講愈起勁！講完擇車條件，又講吓點組裝靚車，當然仲會傾埋香港嘅訓練同比賽路段。跑步嘅朋友，做完運動鍾意一齊拉筋；單車仔上斜落斜Chur完幾個鐘，又會聚埋一齊做啲咩呢？ 主持：牛英 嘉賓：2024香港U23公路計時賽冠軍 李展朗 Leo Sportunes 網站 | www.sportsoho.com/sportunes Instagram | www.instagram.com/sportunes_by_sportsoho Facebook | w…

年青人講武德，演員亦要講演員品德，兩者有冇相似之處呢？呢個討論，由前香港武術代表陳頌天，亦即係《巾幗梟雄之懸崖》入面嘅龍副官講起，就最適合不過。曾經為香港贏得唔少武術國際賽獎項，頌天年前決定退役，投身電視藝員訓練班，從零開始。打鬥場面駕輕就熟，又自問超級勤力，都唔代表演員之路容易行，一向主張「流血不流淚」嘅武術運動員，拍喊戲已經係一大挑戰！今集《Sportsomate》我哋會聽吓頌天嘅拍攝軼事，邊一場戲對佢嚟講最深刻？點解頌天會覺得古裝劇比時裝劇更易掌握？ 主持：椰青 嘉賓：前香港武術代表 陳頌天 Sportunes 網站 | www.sportsoho.com/sportunes Instagram | www.instagram.com/sportunes_by_sportsoho Fa…

跆拳道，踢腿出拳固然重要，其中嘅「道」更加係呢項運動嘅精髓。啱啱喺「香港2024世界跆拳道品勢錦標賽」男子團體公認品勢U30勇奪銅牌嘅呂靖楠（Jason）就尤其認同師傅喺道場所教授嘅人生道理， 對佢嚟講，師傅就好似佢第二個爸爸咁。習武就快二十年，Jason 打過搏擊又玩過品勢，點解佢最後會決定專心發展品勢？Jason 話，佢喺團體品勢項目嗰陣，個人會定啲，原來係因為三個人一齊大嗌嗰下夠氣勢？！ 主持：牛英 嘉賓：品勢跆拳道港隊代表 呂靖楠 Jason Sportunes 網站 | www.sportsoho.com/sportunes Instagram | www.instagram.com/sportunes_by_sportsoho Facebook | www.facebook.co…

運動叻，讀書又叻，香港跨欄運動員 白凱文（Chloe），除咗係香港U18同U20嘅紀錄保持者，今年仲多咗個新身份——香港大學醫科生。講起白袍禮、講起同同學一齊扮病人互相練習、講起入手術室睇住醫生做手術、講起自己立志成為醫生⋯⋯ Chloe 把聲都係充滿興奮同期待，同佢回顧自己參加最後一次亞洲青年田徑錦標賽嘅語氣係一樣，就知道同時兼顧學業同運動其實可行。學業繁忙，唔代表要放棄嚟緊嘅大賽，2025年世大運同世錦賽等，依然喺 Chloe 嘅計劃入面。今集《Sportsomate》，同大家一齊跟呢位品、學、體兼優嘅學界女神學吓嘢。 主持：椰青 嘉賓：香港跨欄運動員 白凱文 Chloe Sportunes 網站 | www.sportsoho.com/sportunes Instagram | www…

"Born To Be A Fighter" 係2024東亞泰拳錦標賽女子60kg金牌陳沅程（Jackie）嘅信念。戰士就係鍾意不斷向難度挑戰，愈戰愈勇。9歲開始玩套路，Jackie 練咗南拳7年先轉戰散打界，全因佢喜歡對打嘅感覺，近年再因為泰拳嘅「拳、腳、肘、膝」比散打更多元化而轉投泰拳擂台。短短兩年，Jackie 已經係擂台拳后，進步神速嘅背後原因係啲咩？武術路上嘅種種，都令 Jackie 嗰團遇強愈強嘅火燒得更旺，回顧以前以散打港隊身份代表香港出戰全運會，到睇返今年東亞泰拳錦標賽，Jackie 有啲咩覺悟？ 主持：牛英 嘉賓：2024東亞泰拳錦標賽女子60kg金牌 陳沅程 Jackie Sportunes 網站 | www.sportsoho.com/sportunes Instagr…

有冇試過講不出聲嘅滋味？明明講完一大輪嘢，但都好似講唔中心入面嗰句咁⋯⋯ 瑜伽導師 Phoebe Lai 就有類似經驗，不過今時今日嘅佢唔會喇，因為佢終於可以用自己嘅母語——廣東話，好生動咁教授佢最鍾意嘅運動。直接、爽快、簡單易明。用廣東話教瑜伽，同用英文教有啲咩分別呢？如果你係學生，你會想聽到老師叫你做個 "Banana Pose" 定係叫你「扮條蕉吖」？曾經做過空中服務員7年，Phoebe 話以前返工雖然都開心，不過嗰個唔係佢「自己」，究竟咩係自己？點樣先搵得返嗰個「自己」？ 主持：椰青 嘉賓：瑜伽導師 Phoebe Lai Sportunes 網站 | www.sportsoho.com/sportunes Instagram | www.instagram.com/sportunes…

「大迫傑都試過跳船啦，我點解唔可以放棄？」長跑及健身教練 Coach Water（水教）從來都冇諗過呢個念頭會出現喺自己個腦到。預備十足，自信滿滿，水教一心諗住喺今年神戶馬拉松跑出好成績，點知個天就係要佢試一次從來都冇試過咁甘嘅撞牆經歷，28K開始，抽完Pat Pat抽小腿，抽完小腿抽大腿，成個下半身呢度抽完嗰度抽，放煙花咁精采。神戶嘅英文係Kobe，Kobe亦係水教心目中嘅傳奇，喺呢個地方遭遇呢一次崩潰，唔知係咪有啲咩契機呢？水教對呢個經歷有啲咩體會？本身係健身教練嘅佢，又覺得自己喺長跑路上有咩優勢？ 主持：牛英 嘉賓：長跑及健身教練 Coach Water（水教） Sportunes 網站 | www.sportsoho.com/sportunes Instagram | www.ins…

用三十年時間醉心於同一樣運動，代表完香港比賽嘅品勢跆拳道運動員黃嘉威，舊年移居加拿大開始佢嘅新生活，幾個月後赫然發現自己患上罕見癌症，不過作為運動員嘅嘉威又點會咁易放棄？化療藥物經過手臂嘅輸液管去到心臟，副作用令嘉威由房行出廳都有困難，但佢最後都捱過咗，今年仲再次喺香港舉辦嘅 2024 世界跆拳道品勢錦標賽亮相。比賽之後，嘉威就會返加拿大完成埋餘下嘅手術，希望聽完今集《Sportsomate》嘅朋友，都同嘉威一樣：✌🏼信自己，冇事✌🏼 主持：椰青 嘉賓：品勢跆拳道運動員 黃嘉威 Sportunes 網站 | www.sportsoho.com/sportunes Instagram | www.instagram.com/sportunes_by_sportsoho Facebook | w…

愈熱愛一樣嘢，就愈怕會失去。大家總認為所有運動都有佢嘅「壽命」，熱愛運動嘅你會唔會都曾經擔心過，過咗某個階段就唔可以再擁有運動嘅快樂？今集《又係我牛英》嘅嘉賓鍾子欣，就用自己嘅故事話你知，只要你想，運動壽命係可以無限延續！由學生時期已經係運動健將，就算畢咗業投身職場，子欣同運動嘅關係依然緊密。冇學界，冇職業賽，其實仲有一個名為先進田徑嘅地方畀你繼續奮鬥，繼續享受運動帶嚟嘅滿足感。喺今年嘅香港先進田徑錦標賽，鍾子欣帶傷上陣，一樣可以五塊金牌落袋！除咗贏比賽嘅激動，子欣完賽仲有啲咩感想呢？ 主持：牛英 嘉賓：先進田徑賽五金得主 鍾子欣 Sportunes 網站 | www.sportsoho.com/sportunes Instagram | www.instagram.com/sportune…

成日聽人講「一夜長大」，但其實長大只係一種感覺，成長係需要靠時間同經驗累積。香港跳繩運動員 潘彥渟（Sophie）由一年級開始跳繩，直到而家享受大學生活嘅同時，依然喺相關運動努力緊，佢有冇覺得自己成長咗呢？當初要隊友姐姐安慰嘅小妹妹，今日就成為安慰人嘅姐姐；以前會因為比賽壓力大而衝入廁所爆喊，Sophie 今日見到細自己好幾年嘅隊友流露不安眼神，佢又會做啲咩？ 主持：椰青 嘉賓：香港跳繩運動員 潘彥渟 Sophie Sportunes 網站 | www.sportsoho.com/sportunes Instagram | www.instagram.com/sportunes_by_sportsoho Facebook | www.facebook.com/sportuneshk Spor…

單線滾軸溜冰運動員陳嫣然雖然只得16歲，但已經有12年嘅相關運動經驗，仲去過唔同地方比賽同訓練。嫣然話，落到場，面對比自己高幾個頭嘅選手，心裡面的確會有不安同膽怯，但佢同時亦搵到自己嘅優勢：靈活地逢人過人，以速度取勝喺大家眼中其實唔難。當然，呢種「唔難」聽落輕描淡寫，實際係由多年嘅重點訓練同唔怕跌嘅心態累積而成。節目主持牛英係一位單車運動愛好者，聽到嫣然嘅訓練同比賽心得竟然有深深嘅共鳴，兩種運動有啲咩共通點？單線滾軸溜冰嘅刺激，對嫣然嚟講又有啲咩咁吸引呢？ 主持：牛英 嘉賓：單線滾軸溜冰運動員 陳嫣然 Sportunes 網站 | www.sportsoho.com/sportunes Instagram | www.instagram.com/sportunes_by_sportsoho …

愛情要經營、要磨合就係人都知，咁一般情侶同體壇情侶要面對嘅問題會唔會有唔同？香港女子競技體操運動員 陳卓琳（Charlie）同另一半都係運動員，一星期訓練六日，要點抽時間同對方見面溝通呢？見到面又會做啲咩維繫感情？好多人都覺得，伴侶要畀到足夠嘅「情緒價值」自己，愛情路先會順利一啲。以 Charlie 為例，接連錯過運動大賽，男朋友喺側邊做咗啲乜令佢振作？今集《Sportsomate》，歡迎大家戴返副 🕶️ 聽吓運動員拍拖嘅苦與樂。放心，甜蜜嘢比較多嘅！💕 主持：椰青 嘉賓：女子競技體操運動員 陳卓琳 Charlie Sportunes 網站 | www.sportsoho.com/sportunes Instagram | www.instagram.com/sportunes_by_spo…

前香港單車代表梁嘉儒喺今年4月宣布退役，結束10年全職運動員生涯，以前喺港隊擔任衝刺手嘅角色，喺港隊畢業後嘉儒仍然喺唔同方面為自己衝刺。3歲學識踩單車，12歲加入港隊青訓，中學畢業後就踏上全職單車運動員之路，當人人都以為嘉儒同單車已經連成一體，嘉儒竟然選擇喺杭州亞運場地單車男子全能賽奪得銀牌後急流勇退，其中原因係咩？而家擔任單車同平衡車教練嘅佢，又點睇小朋友從小學習呢樣運動？ 主持：牛英 嘉賓：前香港單車代表 梁嘉儒 Sportunes 網站 | www.sportsoho.com/sportunes Instagram | www.instagram.com/sportunes_by_sportsoho Facebook | www.facebook.com/sportuneshk Spo…

智能世代，已經好少人鍾意睇字，真係要睇，可能都只係侷限於社交平台上面嗰段唔超過100字嘅短文。香港場地單車代表 程嬿珊（波波），就偏偏鍾意用文字表達自己。除咗單車，波波亦鍾意睇書、影相、拍片，仲鍾意用「千字文」將佢嘅「內在小孩」介紹畀大家。細個同屋企人去旅行，波波會設計遊記《暑假多FUN》；大啲會有本紀錄同隊友相處點滴嘅「小氣簿」，最近佢仲幫《Sportsoho》雜誌負責咗一個叫《一波一轆》嘅專欄。文字豐富咗波波嘅日常生活，亦係一個途徑畀自己同身邊嘅人認識呢位為單車運動努力中嘅運動員。有人話，文字嘅魅力在於想像、訴說同思考，喺波波嘅文字上面，我哋又聽到啲咩故事？ 主持：椰青 嘉賓：香港場地單車代表 程嬿珊（波波） Sportunes 網站 | www.sportsoho.com/sportu…

古語有云：「天將降大任於是人也，必先苦其心志，勞其筋骨，餓其體膚，空乏其身，行拂亂其所為。」胡栢賢（Trevor）對呢句說話應該百感交集。Trevor 係香港健美體操運動員，同時係健身體操中心 FLAIR 嘅創辦人，用運動企業家嚟形容佢亦不為過。Trevor 18歲先開始佢嘅健美體操生涯，訓練期間除咗留意到自己喺運動上嘅表現同限制，佢亦睇到運動員裝備喺市場上嘅不足，於是佢由開發同生產健美體操鞋開始，再到運動培訓，逐步擴展佢嘅企業版圖，希望喺各方面幫到同樣想精進自己嘅運動人。喺呢段時間，Trevor 遇到大大小小、諗過同冇諗過嘅問題，想知運動員嘅身份點幫到佢發展事業；佢嘅事業又點樣幫到熱愛運動嘅人？留意今集《又係我牛英》。 主持：牛英 嘉賓：運動企業家 胡栢賢 Trevor Sportunes…

喺「躺平」呢個詞語興起之前，我哋成日都會聽到 Hea 呢個字。Hea 畀人感覺係隨便、懶散同唔上心，但無繩滑水（Wakesurf）運動員吳曉盈（Angel）就認為，Hea 係放鬆同放慢嘅意思，佢自己亦係一個會 Hea 嘅運動員。咁人哋有冇覺得佢唔認真？Angel：「有成績咪唔會囉！」Hea 係 Angel 嘅減壓之道，但一眾「誇誇群」朋友都係佢成功擺脫壓力嘅幕後功臣，呢班朋友平時究竟有幾「誇」呢？想 Hea 又唔敢 Hea，或者一直 Hea 底上唔返水嘅你，係時候要聽吓今集 Angel 嘅分享喇！ 主持：椰青 嘉賓：Wakesurf 運動員 吳曉盈 Angel Sportunes 網站 | www.sportsoho.com/sportunes Instagram | www.instagr…

有冇試過買廢水嗰陣要求「少甜」或者「走甜」，飲完仲要後悔？又有冇試過增肌減脂期，連甜品 Menu 都唔敢睇？甜品一向被冠上「邪惡」之形容詞，運動狂熱分子 Iris 決定要幫佢哋平反，仲因為咁開咗間 Cafe，希望所有想身體健康嘅運動及非運動人都有個位，搵到自己想要嘅嘢，食晏、嘆甜品、飲咖啡都唔使就住就住。本身極度熱愛運動嘅老闆娘 Iris，無端端點解會推廣起「減糖」，繼而全身投入餐飲業？Cafe 營業時間唔算長，原來係因為老闆娘同員工放工要做運動！今集《又係我牛英》有 Liffee 老闆娘親自分享佢嘅健康生活同飲食之道 😋 主持：牛英 嘉賓：運動狂熱分子 老闆娘 Iris @Liffee.HK Sportunes 網站 | www.sportsoho.com/sportunes Instag…

「除咗運動員呢個身份，要記得你仲係一個人。」運動心理學家盧綽蘅（Karen）如是說。唔少運動員會搵心理學家傾偈同輔導，今集 Karen 就同大家分享咗少少運動員經常遇到嘅問題同困擾。Karen 話，同運動員傾偈，就好似搣洋蔥咁，要一層一層細心地了解同跟進，表面睇到嘅煩惱未必就係最影響運動員嘅問題。以比賽壓力為例，運動員有壓力未必係因為佢睇重輸贏，原來有機會係擔心自己同教練嘅關係會變差？通常星期五同星期日就係 Karen 最忙嘅時候，又係因為咩原因呢？今集《Sportsomate》，一齊學吓點樣支持同聆聽我哋嘅運動員朋友！ 主持：椰青 嘉賓：運動心理學家 盧綽蘅 Karen Sportunes 網站 | www.sportsoho.com/sportunes Instagram | www.i…

跑步教練吳嘉諾（Kanok），細個曾經因為哮喘而被禁止參加體育活動，但呢啲阻撓並冇動搖過 Kanok 想運動嘅心。喺中學初嚐跑步攞第一嘅滋味，Kanok 又再行多步，接受正規長跑訓練，如是者一步一步跑到做教練，仲創立埋 Big Big Track Club 跑團，點著埋其他人團火。跑步唔係想像中咁簡單，但要迷上跑步就好容易，好似 Kanok 喺節目中多次提到：要開心，開心最緊要。半馬跑出 PB，全馬竟然抽筋失利，Kanok 依然主張「笑住返終點」。比賽條路可能只得幾十公里，但跑步條路其實好長，點樣可以令自己一直跑落去？聽吓今集 Kanok 嘅分享啦！ 主持：牛英 嘉賓：吳嘉諾 Kanok @Big Big Track Club Sportunes 網站 | www.sportsoho.com…

「上天為你關了一扇門，就會為你開一扇窗」今屆巴黎奧運見唔到香港女子重劍代表連翊希（Coco）上陣，但奧運劍擊同佢嘅連繫可能比上屆東京奧運更強，因為今年係 Coco 首次以劍擊評述員身份出現喺各家各戶嘅電視入面。第一次踏入尤如戰場嘅錄影廠，分秒必爭、計劃趕不上變化嘅直播時間，令 Coco 大開眼界之餘，亦令佢有機會用上帝視角去睇劍擊運動嘅種種，重新思考自己同劍擊甚至奧運嘅關係。一邊評述隊友嘅比賽，一邊擔心佢哋嘅發揮，究竟係一個點樣嘅體驗？喺奧運場上比賽嘅緊張，同坐上評述台前嘅緊張有咩唔同？ 主持：椰青 嘉賓：香港女子重劍代表 連翊希 Coco Sportunes 網站 | www.sportsoho.com/sportunes Instagram | www.instagram.com/spo…

香港健美代表翟佩君（Cadee），早前代表香港出戰第56屆亞洲健美錦標賽，除咗贏得健體小姐組別亞軍，亦為港隊攞到女子一件式泳裝組別嘅冠軍，但原來佢嘅健美歷程只有兩年！短短兩年，佢係點樣由健身教練一路行到上健美舞台？健美由健康開始，但健美又唔等於健康？Cadee 熱愛運動，成為教練同運動員之後，仲考埋國家級營養師資格，食嘢同運動雙管齊下，唔怪得能夠「美」夢成真。Cadee 對自己非常嚴格，但對學生就盡量貼地，今集《又係我牛英》，Cadee 就教咗幾招入門貼士，唔鍾意做運動嘅朋友都啱用，輕輕鬆鬆行出第一步！ 主持：牛英 嘉賓：香港健美代表 翟佩君 Cadee Sportunes 網站 | www.sportsoho.com/sportunes Instagram | www.instagram.…

好多女仔聽到要做運動都好多擔憂，怕流汗又怕曬，一陣又驚畀蚊咬⋯⋯明明知道踏出第一步，就可以同「運動」連結，但嗰一步偏偏就好似隔咗個海咁。有人陪會唔會好啲呢？梗係會啦，你見中學去個廁所都要同朋友同行就知啦。Miss Run 體能班嘅主教練簡杏芳（Elco）深明呢個道理，所以同拍檔組織咗呢個畀大家 Run 返起自己身體嘅全女生體能班，跑都係其次，郁先係重點！大家圍埋一齊瞓地下，抬腿傳波再寫字，笑住玩，啲時間眨吓眼就過。你全件衫濕晒，我啲汗一滴滴沿住額頭流落下巴，但一啲都唔尷尬，運動女生 Get！ 主持：椰青 嘉賓：田徑教練 簡杏芳 Elco Sportunes 網站 | www.sportsoho.com/sportunes Instagram | www.instagram.com/sport…

做運動，除咗講體格，食腦都好重要。因為奏效嘅策略係可以令你喺比賽中從後趕上，逆轉結果。香港三項鐵人代表黃子圖，就係一位講策略嘅選手。對子圖嚟講，「努力」係運動員嘅基本配置，要突破同場對手，調極心態同策略就係分高低嘅關鍵。游水、踩單車同跑步，拆開每一樣都需要極大體能，更何況係三樣一齊玩？所以比賽中嘅細節尤為重要，連「與抽筋共存」都要練！今集《又係我牛英》，子圖會同大家分享訓練同比賽嘅心得，原來如今成績突出嘅佢，以前係唔鍾意三鐵？失約巴黎奧運嘅子圖，嚟緊嘅洛杉磯奧運會唔會就係佢嘅囊中之物？喺奧運之前，我哋仲可以喺邊度見到呢位鐵人嘅星火呢✨？ 主持：牛英 嘉賓：香港三鐵代表 黃子圖 Sportunes 網站 | www.sportsoho.com/sportunes Instagram | www…

堅持 Vs. 放棄，對大部分運動人嚟講都係殘酷二選一；但對由單車運動員轉換為跑手嘅黃亦皜（Parco）嚟講，兩者嘅本質其實都係一樣 —— 選擇。兩年前嘅一場交通意外，為 Parco 帶嚟一條有間尺咁長嘅大疤痕，亦為佢帶嚟一次重新開始嘅機會。旁人睇，佢好似被逼「放棄」咗啲嘢，但當下嘅人生，係咪淨係得「堅持」兩個字？我哋成日將「放棄」睇到好負面，有冇諗過佢其實係一個時機，畀你發掘更多值得「堅持」嘅路向？掙扎緊嘅你，You're not alone！因為今集《Sportsomate》嘉賓黃亦皜 Parco 一樣掙扎過！ 主持：椰青 嘉賓：山賽好手 黃亦皜 Parco Sportunes 網站 | www.sportsoho.com/sportunes Instagram | www.instagr…

唔知幾時開始，「好勝」成為咗負面評價，令好多運動員唔敢公開表示自己想贏，香港青年單車代表羅智賢（Samuel）係例外。自細接受三項鐵人訓練，Samuel 都企過唔少次頒獎台，但隨住年紀漸長，Samuel 開始發現自己未及身邊嘅對手。因為想贏，Samuel 毅然決定轉換跑道，專注踩單車，16歲嘅佢形容呢個係一個「新開始」。因為有求勝嘅意識，大至比賽心態； 小至單車上嘅硬件配置，Samuel 都選擇搏盡，亦因為咁，佢終於喺今年全國青少年 U 系列公路自行車錦標賽踏上團體冠軍嘅台階。Samuel 話今次常州之行非常難忘，想知 40 度天氣下嘅佢經歷過啲咩？起飛前又點解會著起咗反光衣行落停機坪？立即收聽今集《又係我牛英》！ 主持：牛英 嘉賓：青年單車運動員 羅智賢 Samuel Sportunes …

有人話龍門係球隊入面最孤獨嘅角色，但女子足球港隊守門員、和富社企嘅隊長周錦儀（Kelly）就認為，只要係球隊一員，任何時候都係分享緊同等嘅喜悅。既係足球員，又係教練，仲係球隊物理治療助理，人生幾乎同足球分唔開，不過 Kelly 仍然未滿意，依然向緊「100%足球人生」呢個方向進發。細個曾經被反對踢波，連參加足球訓練班都唔敢同屋企人講嘅 Kelly，今日見到父母入場睇比賽有咩感覺？面對舉手話要做守門員嘅女學生，Kelly 又係點樣應對？喺 Kelly 心目中，有啲咩特質先能夠成為一位出色嘅龍門呢？ 主持：椰青 嘉賓：港隊守門員 周錦儀 Kelly Sportunes 網站 | www.sportsoho.com/sportunes Instagram | www.instagram.com/s…

全城為奧運場上健兒高興，其實仲有啲港產工作人員值得大家驕傲，三人籃球國際裁判何明達（Edmond） 就係其一。繼上屆喺東京奧運吹判三人籃球決賽，今屆巴黎奧運都有 Edmond 嘅踪影，呢一次亦係佢喺掛哨前嘅 "Last Dance"。少啲出現喺場上，唔代表佢就此放棄醉心嘅三人籃球，因為 Edmond 已經加入咗國際籃球總會（FIBA）擔任三人籃球裁判主管一職，用另一個方法發展同推廣佢熱愛嘅運動。由屋邨街場、學界賽事吹哨吹到上奧運籃球場，呢條路係點行出嚟？Edmond 又覺得喺呢幾個場合做球證，有啲咩唔同？ 主持：牛英 嘉賓：FIBA 三人籃球裁判主管 何明達 Edmond Sportunes 網站 | www.sportsoho.com/sportunes Instagram | www.i…

熱血對你嚟講，係咩意思？對運動 Slasher 陳慧賢（Vera）嚟講，熱血並唔係「明知不可為而為知」，而係相信人生嘅可能有千百種，每樣都要試盡同畀盡。 曾經入選跆拳道港隊嘅 Vera，最後並冇繼續留喺跆拳道發展，但為咗成為一位動作女演員，佢重返道館，花心機花錢花時間就係為咗練好一個540旋踢，縱然最後嘅拍攝並冇用到呢一招。成日話做咗大人，熱血就會燃燒殆盡，有冇諗過如果啲血真係夠熱，無論你係大人定細路、無論你轉換咗幾多條跑道，都會去到你最終嘅目標？ 主持：椰青 嘉賓：運動 Slasher 陳慧賢 Vera Sportunes 網站 | www.sportsoho.com/sportunes Instagram | www.instagram.com/sportunes_by_sportsoh…

因為姓氏而被香港人留意，係因為刁俊稀（Felix）喺比賽前嘅一個動作：當時佢指住自己嘅號碼布，話畀鏡頭前嘅大家知，佢就係代表香港出戰巴黎奧運100米賽事嘅跑手。5月喺香港錦標賽中跑出10秒33刷新個人最佳時間，Felix 都唔敢肯定自己能夠出戰奧運，直至奧運開幕前嘅一個月，Felix 先知道自己嘅夢想成真。田徑場上坐滿觀眾，對 Felix 嚟講已經足夠夢幻，喺紫色嘅跑道上預備嗰陣，佢諗緊啲乜？Felix 坦言起跑前有手震，但就唔係因為緊張，咁係咩原因？今集《又係我牛英》，我哋同呢位百米飛人一齊感受奧運零距離！ 主持：牛英 嘉賓：香港100米奧運代表 刁俊稀 Felix Sportunes 網站 | www.sportsoho.com/sportunes Instagram | www.ins…

比賽前要傾偈，唔只同隊友傾，仲要同對手傾？有別於一般團體運動，極限飛盤係一項非接觸式、自我裁判嘅運動，所以參與賽事嘅運動員，需要非常熟悉比賽規則之餘，仲要事前就清楚對手嘅底線，否則比賽就唔能夠順利進行。唔可以身體接觸，又要搶到對方手持嘅飛盤，港隊成員劉浩晴（Stephanie）形容，呢啲就係極限飛盤好玩嘅地方！喺外國讀書嗰陣已經接觸呢樣運動嘅佢，因為「太好玩」嘅關係，返到香港就自薦參與中國香港飛盤總會舉辦嘅比賽同訓練，嚟緊10月仲會幫手搞個以香港為主場嘅香港泛亞極限飛盤賽。喺有限嘅資源下，佢會點安排一個好玩得嚟又競爭性十足嘅國際賽事？ 主持：椰青 嘉賓：極限飛盤港隊成員 劉浩晴 Stephanie Sportunes 網站 | www.sportsoho.com/sportunes Inst…

細個因為身型而被老師邀請推鉛球，點估到健身教練許少宇（Davis）最後情歸跑步？Sub-3 一直係 Davis 嘅目標，雖然暫時都仲係同呢個目標擦身而過，但 Davis 堅信有一日佢會做到。喺達成目標之前，每個喺跑步上得到嘅覺悟，都會係 Sub-3 嘅一部分。呢啲覺悟可能係來自跑步中嘅靜思；可能係來自「互相逼害」嘅跑友；亦可能來自一樣喺 Sub 3 邊緣掙扎緊嘅大家。如果睇緊呢個 Post 嘅你，跑到有少少失去方向，不妨聽吓今集《又係我牛英》，可能你會喺 Davis 口中搵到啲繼續跑落去嘅理由！ 主持：牛英 嘉賓：健身教練 許少宇 Davis Sportunes 網站 | www.sportsoho.com/sportunes Instagram | www.instagram.com/sp…

「當你真心渴望某樣嘢，成個宇宙都會聯合起嚟幫助你完成。」呢句說話曾經鼓勵過無數咁多位運動人，亦令我哋思考究竟「相信」嘅力量有幾大。活躍運動圈嘅本地歌手盧巧音（Candy）就話，相信自己做到，比起想自己做到來得容易。同 Candy 一樣熱愛跑步嘅你，可能都曾經為自己訂立過好多唔同嘅目標，想PB、想攞牌、想有好成績等等，但真係未必次次都如你所願，咁係咪即係你信錯咗自己？試過撞牆，又試過受傷，Candy 話佢都冇懷疑過自己，唔通佢訂目標嘅步驟同其他人唔同？跑步、游水、打拳以外，Candy 近來仲做埋 Stick Mobility 助教，呢段時間，佢向宇宙下咗啲咩訂單？今集《Sportsomate》，椰青同你一齊跟 Candy 學許願，做個更好嘅自己！ 主持：椰青 嘉賓：樂壇跑手 盧巧音 Candy…

200米，10.76秒。場地單車運動員馬正匡（Nicholas ），近年喺本地及國內外單車賽嶄露頭角，早前就喺2024全國青少年U系列場地自行車錦標賽攞到一銀一銅嘅佳績，其中嘅個人計時賽，只係用咗10.76秒就完成200米，同金牌得主嘅成績僅僅相差0.1秒。平時喺香港練習，絕大部分都係有冷氣嘅室內練習場，今次去到蘇州一嚐烈日下嘅室外場，Nicholas 笑言「以為自己就嚟死」。同場比賽嘅人個個都身材魁梧， Nicholas 落場嘅時候諗緊咩？上到頒獎台嗰刻，對手見到 Nicholas 又有咩感受？單車畀到 Nicholas 一份自由自在嘅感覺，但訓練嘅每分每秒都唔係容易，今集《又係我牛英》有 Nicholas 同大家分享當中嘅苦樂點滴。 主持：牛英 嘉賓：單車新星 馬正匡 Nicholas …

"Trust Yourself!" 張家朗喺奧運金牌戰打到 12:14 嘅時候，教練喺場邊對住佢大嗌。相信自己，係每個人都要學習嘅課題，尤其係運動員。今集《Sportsomate》嘉賓，楊鎧駿 （大Dee）都學習緊。外表靚靚仔仔，跑得又睇得嘅大Dee，原來一直都冇乜自信。曾經創出佳績入選香港田徑代表隊，又試過跑樓梯跑到全球總排名第5，但喺佢心入面仍然覺得自己做得唔好。運動員喺鞭策自己同相信自己兩方面，要搵到一個平衡點真係好難！當初讀緊書嘅大Dee，同而家已經涉獵咗唔同領域嘅大Dee，喺訂立運動目標嘅時候會唔會有唔同呢？ 主持：椰青 嘉賓：長跑好手 楊鎧駿 大Dee Sportunes 網站 | www.sportsoho.com/sportunes Instagram | www.insta…

北海峽（North Channel）位於北愛爾蘭同蘇格蘭之間，被譽為「世界七大海峽挑戰」中難度最高，有人更加將北海峽形容為海上嘅珠穆朗瑪峰，港人梁俊曦（Ryan）偏偏就要向極限挑戰，仲成功成為第一位完成呢項創舉嘅香港泳者。用14個鐘頭橫渡水溫只有攝氏11度嘅大海，喺長達40公里嘅旅程中遇過高過人嘅水母；經歷好幾次水流改變，游一米退兩米；熱水裝置失靈；出現幻覺⋯⋯ Ryan 游緊水嗰陣究竟諗緊啲咩？中途係點補給？想挑戰嘅人，事前又要做啲咩預備？ 主持：牛英 嘉賓：首位成功橫渡北海峽港人 梁俊曦 Ryan Sportunes 網站 | www.sportsoho.com/sportunes Instagram | www.instagram.com/sportunes_by_sportsoho …

有別於艷麗又帶挑逗性嘅舞步，具有健身教練身份嘅鋼管舞者 Shawn Tung 選擇「著最簡單嘅衫，練最辣嘅招」。基本招式多練就會掌握，但要擁有呢一身功夫，Shawn 仲做咗啲咩？跳鋼管舞竟然有如武俠小說中嘅幫派修練，形容自己係「劍走偏鋒」嘅 Shawn 話鋼管舞同丐幫尤其相似，究竟係深造嘅內容似，定講緊香港嘅鋼管舞文化吖嗱？鋼管舞界嘅男舞者依然係少數，但如果佢哋鑽研嘅係比較適合男性身體構造、或者男舞者更有優勢嘅舞步，咁佢哋會唔會變返多數呢？ 主持：椰青 嘉賓：鋼管先生 Shawn Tung Sportunes 網站 | www.sportsoho.com/sportunes Instagram | www.instagram.com/sportunes_by_sportsoho Facebo…

去年接連打破女子400米U20及U18香港學界紀錄，17歲混血小飛人徐穎恩（Jane）從未言倦，隨後更加喺亞洲少年U18田徑錦標賽再下一城，於烏茲別克什干嘅賽場上，將個人400米紀錄推前至55秒68，一舉摘銅。 冇屋企人陪住出國，Jane 話今次烏茲別克之旅非常興奮，賽後仲同嚟自世界各地嘅跑步好手交換咗聯絡方法𠻹！呢位跑步女將目前隨咗喺學校訓練，亦有分別參與體院同飛達田徑會嘅訓練，一星期跑咁多日，Jane 嘅時間係點分配？嚟緊就要考 DSE ，佢又有咩打算呢？ 主持：牛英 嘉賓：新生代女飛人 徐穎恩 Jane Sportunes 網站 | www.sportsoho.com/sportunes Instagram | www.instagram.com/sportunes_by_sports…

台灣係近年港人潛水熱點，Jying 就連個 Padi 水肺潛水教練牌都係喺台灣考返嚟。當初暈住船浪入到綠島，一留就留咗兩三年，每日嘅生活就係同學生潛入清澈見底嘅大海睇魚睇珊瑚，又或者近距離觀察趴喺礁石休息緊嘅海龜，再經佢哋雙眼進入另一個更寧靜嘅世界。周遭嘅人，尤其係喺香港生活緊嘅朋友，見到 Jying 嘅綠島日常，一般都係既羨慕又妒忌。「我都好羨慕我自己。」Jying 笑言。不過人在異鄉，日子當然係一半苦澀一半甜，今集《Sportsomate》，不如就聽吓，喺陽光、海水同古銅色皮膚嘅後面，Jying 仲要獨自面對啲咩課題？ 主持：椰青 嘉賓：潛水教練 Jying Sportunes 網站 | www.sportsoho.com/sportunes Instagram | www.instag…

嚟自 DarkArt 車隊嘅單車運動員 李偉樂（樂哥）踩車資歷唔算太深，2019年到而家只有大槪5年經驗，不過喺圈內已經有唔少人聽過佢個名，因為大家經常會喺蒲崗村道單車賽嘅頒獎台上見到佢。會將 "All In" 掛喺嘴邊嘅樂哥最近仲自費同港隊一齊去咗哈薩克比賽，五日四夜嘅行程，似乎每一刻都有嘢落袋：「一生人一定要最少去一次！」預備比賽嘅過程唔容易，淨係要保持到喺香港比賽嘅成績已經夠樂哥來回地獄好幾次，係點樣嘅信念支撐樂哥用9分39秒就踩到上飛鵝山？進步神速嘅背後樂哥做咗啲咩呢？今集《又係我牛英》，一齊跟呢位單車運動員偷下師。 主持：牛英 嘉賓：單車運動員 李偉樂 Sportunes 網站 | www.sportsoho.com/sportunes Instagram | www.instag…